Tsakure

Mujallar JWAL ta fara bayyana ne a shekar 1964. A wajen bukin cika shekaru 50 da fara wallafa wannan mujalla, wannan takarda da na gabatar ta hasko wani dogon tarihi na dangantaka tsakanin mujallar da harsuna ‘yan gidan Cadi. Takardar tana kira  ga sake dawo da ɗabbaƙa nazarin kimiyyar harshe da ya shafi dangantaka ta tarihi tsakanin harsuna a Afirka, sannan kuma tana kira ga ɗalibai ‘yan Afirka da su mayar da ƙarfin bincike-bincikensu na ilmin kimiyyar harshe ya zama a kan kwatanta al’amura na tarihi tsakanin harsunan Afirka. Takardar tawa ta yi bayanai a taƙaice na kwatancin al’amuran tarihi tsakanin harsunan tsakiya  na iyalan gidan Cadi kusan 80.Waɗannan harsuna su ne mafiya yawa daga cikin rukunai huɗu na harsuna ‘yan gidan Cadi a Afirka ta yamma. Haka kuma sun fi kowane rukuni yawan harsuna a cikin babban rukunin harsuna na Afroasiatic. Wasu muhimman bayanai da suka tuzgo, waɗanda kuma suka jiɓinci sake bibiyar tarihin ilmin tsarin sauti da fasalin ginin kalmomi a harsunan tsakiya na iyalan gidan Cadi, su ne fitattun alamomi na kashe-kashe kamar su fasalin  ‘tushe-da-tsari’ da fasalin sassauƙan tsari na bai-ɗaya na tsarin wasula da rawar da ‘gishirin magana’ irin su ganɗantawa da wawuntawa da gunna da hamzantawa da bauɗewar tsarin tushe suka taka. Duka waɗannan sun ba da damar a fahimci yadda yawaitar tsaruka daban-daban na wasula ta samu a tsarin harunan na dauri da kuma yadda a yau aka sami shigowar sababbin baƙaƙe a harsunan, wanda kuma hakan shi ya sa harunan tsakiya na ‘yan gidan Cadi suka yi ƙaurin suna a samun bambance-bamabance a kamannin su.