Àṣamọ̀

Iṣẹ́ ìwádìí lórí ṣíṣe ìfaramọlé fún àwọn ọ̀rọ̀ àyálò èdè Gẹ̀ẹ́sì onísílébù kan, pàápàá jùlọ àwọn tó ní bátáànì CVC, nínú èdè Yorùbá túbọ̀ ń tẹ̀síwájú. Ní pàtó, ọ̀rọ̀ èdè Gẹ̀ẹ́sì oníhun CVC máa ń di CVVCV nínú èdè Yorùbá látàrí sísọ fáwẹ̀lì kan ṣoṣo tinú èdè Gẹ̀ẹ́sì di méjì, pẹ̀lú ṣíṣe àfibọ̀ fáwẹ̀lì ní’parí ọ̀rọ̀ bẹ́ẹ̀ (fún àpẹrẹ, cup /kᴧp/ → [kɔ́ɔ̀bù]). Àbá méjì ọ̀tọ̀ọ̀tọ̀ ni àwọn aṣèwádìí ti gbé kalẹ̀ fún ṣíṣe ìfaramọlé fún irú àwọn ọ̀rọ̀ àyálò bẹ́ẹ̀. Ní pàtó, àwọn àbá náà dá lórí ohun tó ṣe okùnfà sísọ fáwẹ̀lì kan ṣoṣo tinú èdè Gẹ̀ẹ́sì di méjì nínú èdè Yorùbá. Àbá àkọ́kọ́ sọ pe, Yorùbá sọ fáwẹ̀lì náà di méjì láti rí i pé àtẹ̀mọ́ ìsàlẹ̀ tó máa ń wà lórí ọ̀rọ̀ oníhun CVC ti èdè Gẹ̀ẹ́sì di ohùn òkè àti ohùn ìsàlẹ̀ lórí àwọn fáwẹ̀lì méjéèjì náà nínú èdè Yorùbá. Àbá kejì sọ pé, Yorùbá fa fáwẹ̀lì náà gùn (tàbí sọ ọ́ di méjì) láti rí i pé mòráà (‘mora’) méjì tó wà nínú ọ̀rọ̀ èdè Gẹ̀ẹ́sì oníhun CVC kò yàtọ̀ sí èyí tó wà nínú èdè Yorùbá. Iṣẹ́ ìwádìí yìí dá sí àríyànjiyàn yìí nípa ṣíṣe àgbékalẹ̀ àbá mìíràn. Fún èmi o, àyàbá lásán ni àwọn àbá méjéèjì wọ̀nyìí jẹ́; ohun tó ṣẹlẹ̀ gan ni wípé Yorùbá sọ fáwẹ̀lì náà di méjì láti rí i pé àwọn ọ̀rọ̀ àyálò èdè Gẹ̀ẹ́sì onísílébù kan wọ̀nyẹn, ọ̀pọ̀lọpọ̀ èyí tí í ṣe ọ̀rọ̀-orúkọ, di ọ̀rọ̀ onísílébù méjì nínú èdè Yorùbá nítorí pé kò sí ọ̀rọ̀-orúkọ kankan nínú èdè Yorùbá, yálà aṣẹ̀dá tàbí àìṣẹ̀dá, tí sílébù rẹ̀ kéré sí méjì. Ohun tí àbá titun yìí gùn lé lórí gan ni pé, èdè tó yá ọ̀rọ̀ lò máa ń rí i pé àwọn ọ̀rọ̀ bẹ́ẹ̀ faramọlé, kìí ṣe pé ó fẹ́ kí wọ́n wà ní ìbámu pẹ̀lú ìhun tàbí bátáànì tí wọ́n ní nínú èdè tí wọ́n ti ń bọ̀. Orí tíọ́rì ọptimálítì ni a gbé ìtúpalẹ̀ tí a ṣe nínú iṣẹ́ ìwádìí yìí kà. Púpọ̀ nínú àkójọ-èdè-fáyẹ̀wò tí ó jẹyọ nínú pépà yìí wá láti inú àwọn iṣẹ́ ìwádìí tí a ti ṣe ṣáájú, a sì gba èyí tó kù lẹnu àwọn aṣafọ̀ abínibí èdè Yorùbá tí a ṣàyàn. Ọ̀rọ̀ àyálò èdè Gẹ̀ẹ́sì méjìlélógójì ni a ṣàyàn fún ìtúpalẹ̀ tí a ṣe nínú iṣẹ́ ìwádìí yìí.