Tanya boowa

Ahin kadasi n kere fa kɔ kabo Anufɔm di konijuem wara bu bo tataciri sɛɛ nu barasu n wɔ. Ama, siifɔm beberebe nya fa má bu sunsuni se má i su. Haari ni bo siifɔm dɔŋgu akɛrɛ Anufɔ aniɛ n afifiifti i kunnu jɔrɛm nu n kɛrɛ mmɔɔ ni. Deke bo ahin kɛrɛɛwa n jina su n la ka, i kpokpo Anufɔ aniɛ n nu fa kɔ tataciri juem ni bu ŋusu woowa wɔ. Dama, Anufɔ tataciri jue ti sunsuni kere nɔaniɛ jɔjɔɔwa wɔ, na i kere kabo Anufɔm sun koko bu sɛɛm nu barasu. Kɛrɛfɔ n natiiri awɔrɛ awɔrɛ nu deeri nɔaniɛm labari fiteeri minɛm dɔ ni i tiɛŋgu dɛɛ sii bo i la fa kɔ kabo Anufɔm bo tataciri barasu n ye i fa kɛrɛɛri ahin kadasi n a. Dama ka yiri mmɔɔ ni i tii, ti Anufɔniɛ wɔ. I faari kabo bu yo dekem dɛɛ sunsuni fa saŋga ni tataciri juem dɛɛ kunnu jɔrɛm n atin su fifiitiiri nɔaniɛ n nu a. Nyini fifiiti nu n nu, kadasi n su kere ka Anufɔ tataciri jue n ti kara kereewa bo bu akɛrɛ i wɔ. Jue n kunnu fifiiti nu, ni i agɔrɛ gɔɔwa dɛɛ fifiiti nu n kɛrɛ kere ka tataciri ti jue di ni soro su deke wɔ.  Juem la bu kunnu awoorim bo bu nbem nati fa kɔ jɔrɛ bisaawam ni bu bɔnum wara jɔrɛ bɔnu ni i bisaawam dɛɛ atinm. Na bu kaaki nati ni agɔrɛ gɔ neŋgem bo bɛrɛ ma tataciri n yo fiɛfiɛ a. Jue n kɛrɛɛwa kunnu jɔrɛ bo yiri ti tataciri n ni tii titiki n la kabo bu gɔ agɔrɛ n ni sunsuni kereewa, ni sawɔrɛ kpakpam bo bu koko i fa kɔ yiwee ŋusu jɔrɛm. I awieeri su, kadasi n kere ya Anufɔ tataciri juem ŋusu jɔrɛm wɔ, bɛrɛ la anyundɔrɛm  barasu bo  bu kun n kun kɛrɛ tiɛŋgu awoorim kere kabo Anufɔm woowa ni bu sunsuni ti barasu. Kadasi n awieeri la ka, Anufɔ tataciri jue n ti nɔaniɛ jɔjɔɔwa deke bo i la i tiɛŋgu kɛrɛɛwa awoorim bo minɛm koro sɔnsɔn i na bu si, na bu ti i nyunyumi, nzɛn bu la Anufɔm nasiriya yoowam si. Ahin kadasi n kun kpɛrɛ, dama, i buka nɔaniɛ jɔjɔɔwam dɛɛ kara sɔnsɔn fifiitinum su fa kɔ nananu aniɛm kɛrɛ bo bu wo Afirika asien n su, na minɛm dɔŋgu si má bu sa ni, fa saŋga ni Anufɔ aniɛ n tiɛŋu dɛɛ nɔaniɛ jɔjɔɔwam kɛrɛ.