Àṣamọ̀

Iṣẹ́ ìwádìi. Yìí ṣe àgbéyẹ̀wò ìhun síńtáàsì àwọn ìgékúrú ọ̀rọ̀ Yorùbá (AIOY) lórí pẹpẹ ìbánisọ̀rọ̀ ayélujára X. Ìwádìí yìí ṣe àyẹ̀wò àwọn òté ìyídà tí ó ní ṣe pẹ̀lú ìlànà ìṣẹ̀dá wọn. Bí ó tilẹ̀ jẹ́ pé ìgékúrú jẹ́ ọ̀kan lára ìlànà ìṣẹ̀dá ọ̀rọ̀, kìí ṣe ọ̀kan lára ìlànà ìbílẹ̀ ìṣẹ̀dá ọ̀rọ̀ lédè Yorùbá, inú èdè Gẹ̀ẹ́sì tí a ti sábà máa ń lò ó ni a ti yá a. Tíọ́rì onípele (Ẹ́sí-baà) àti òfin ìgbéfò abẹ́ tíọ́rì awòté-wògàba ní a fi ṣe àtúpalẹ̀ àwọn ìgékúrú yìí. Àwọn tíọ́rì yìí ṣàlàyé bí òfin ìyídà ṣe so ìhun ìpìlẹ̀ mọ́ ìhun òkè. Ìlànà ìgbésẹ̀ ìyídà mẹ́ta ni ìtúpalẹ̀ iṣẹ́ yìí fúnka mọ́, àwọn ni: ìgékúrú, ìfibọ̀, àti ìgbéfò àwọn fọ́nrán ìhun láti ipò kan sí òmíràn. A gba èròjà-àmúkalẹ̀-fáyẹ̀wò lórí pẹpẹ ìbánisọ̀rọ̀ ayélujára X láti oṣù kìíní ọdún 2023 títí dé oṣù kẹjo ọdún 2024 nípasẹ̀ àwọn àkọsílẹ̀ àti àríwísí olùlò. Ẹ̀ẹ́dẹ́gbẹ̀ta túìtì lórí ọ̀rọ̀ ìṣèlú, eré ìdárayá, ẹ̀sìn, àti ọ̀rọ̀ ajẹmọ́ takọtabo ni a wò, tí a sì fi tíọ́rì onípele àti òfin ìyídà abẹ́ tíọ́rì awòté-wògàba ṣe àgbéyẹ̀wọ̀ àádọ́ta àwọn ìgékúrú ọ̀rọ̀ Yorùbá (AIOY). Iṣẹ́ ìwádìí yìí fìdí rẹ̀ múlẹ̀ pé ọ̀nà mẹ́rin ni a lè pín àwọn ìgékúrú ọ̀rọ̀ orí pẹpẹ ìbánisọ̀rọ̀ ayélujára X sí ní ìlànà síńtáàsì, àwọn ni ọ̀rọ̀ ìgékúrú tí a ṣẹ̀dá láti ara gbólóhùn àlàyé, ìyísódì, àkíyèsí alátẹnumọ́ àti ìbéèrè. Ní ìkádìí, a ṣe àkíyèsí pé fífi ojú ìmọ̀ ẹ̀dá-èdè ajẹmáwùjọ àti ajẹmọ́hun ṣe àgbéyẹ̀wò ìlànà ìbànisọ̀rọ̀ lóri ayélujára le ṣe ìrànwó fún ṣíṣe àfihàn ipa èdè ayélujára lóri ìdàgbàsókè èdèYorùbá.