Akak ú puónyi

Kálata ewe ɛ́ɛ́sɛɛkunɛ aní mekélíkélíe nyi’ɛ́ á nukálu pápílaná’ɛ́ɛ nuasúɛ, nukálu ɔ́ kitɔŋ kí Kemelún. Mekélíkélíé makáaní nyi mɛ́ pɛɛndu pákálanáa nuasúɛ tɔɔmɔ akí pémeétúm ákála. Kipíli ekíe ɛ́ɛ́sɛɛkunɛ aní ɛnyi’ɛ́ kuenditi sɔ́kɔ́ ne ekelú alúndán, aní ɛnyi’ɛ́ kuówunu wú puandá ne ékelú eselén, kúnyáani mekélíkélíé mámaátapúkú tɔɔmɔ. Púnyi kupá mekélíkélíe má nínúana, kúnyáani mékélíkélíé mé metúkú móólónóo. Ɛ́ éenditi sɔ́kɔ́ ne ekelú alúndán, kunyáani ne ekelú eselén, pakáaní ni kuúku pátátú : káni ukutúan, áákálan pasipasi sɔ́kɔ́ omoómí, káni ukáándíɛ áákálan pɔsɔ́kɔ́ kuteke, káni ukusúkini aákálan na kipán. Pakáni pakáaní ééséndesi ké ekelú wááwu ne piénsi pí moónyi ɔɔ́yikɔnɔ́ é mekélíkélíé. ɔ́ kuɔyɔ ilááŋ na nukálu nú nuasúɛ áápianá pakáni kuteke: maandá mápítápukánáa nínúana ákí tukálanáa, maandá mápítápukanáa siki kisikili’ɛ, maandá mɛ́mɛ́nyɛ́ɛ́kɛ́t ápítápukan mɔnɔ́ kisikili, maandá másiápítápukan kiɛmɛ́ɛmɛ, maandá mányípítápúkán púyoó, maandá mámaápítápúkán kaya, maandá mámaápítápúkán tɔɔmɔkɔ́tɔm, maandá mákáaní áápítápukanáa mɔnɔ́ kisikili, maandá mákaání ápítápukanáa kiɛmɛ́ɛmɛ, maandá mákaání pítápukanáa ɔ́ tuɔŋɔ túólonóo. Púéséndesi siki kisikili’ɛ ekí puandá pítápukanáa, kúnyáni kisikili ekí pátiánípá pémenyen índí puandá kapítápuk. Ekelú úmákatanáa kúnyáani úselenée éséndesi mekélíkélíe. Puólí epúe áátúfáan kumeny kuteke kú nuasúɛ, púɛ́nɛkɛn púondo púɛlɛ ɛ́ɛ́ túónyonyi núú.